ཁ་རིན་པོ་ཆེ་ཁྱེད་བསམ་ནག་ཅིག་རེད།
རང་ཁ་རང་ལ་ཐོགས་ཡོད།།
སིལ་ཏོག་ནགས་ལ་ཐོགས་ཡོད །།
སྐད་ཆ་དོན་མེད་ཤོར་ན།།
རང་ཉིད་ཕོངས་བྱེད་འབའ་ཞིག །
དུས་དང་བསྟུན་ཤེས་མཆོག་ཡིན།།
མ་བསྟུན་བཤད་དབང་ཁྱོད་མེད།།
ཁ་ཆུ་འོ་མ་མིན་ནོ །།
མྱིང་མེད་ཁྱེད་ཀྱིས་ཤེས་དགོས།།
ཨ་རོ་ཞུ་ལི་མྱིང་མེད།།
བསམ་བློ་བཏང་གི་མཐའ་མ།།
རང་ཉིད་ནོར་བ་ཤེས་ན།།
རང་ཁ་རང་གིས་འཛིན་དགོ །
ཤེས་ལྡན་འཛོམ་པའི་གྲལ་དཀྱིལ།།
རིག་པའི་མྱེ་ལྕེ་འཁྱིལ་ས།།
ང་དང་མྱིང་མེད་ཁྱེད་ལ།།
དབང་བའི་གར་སྟེགས་མ་རེད།།
འཆད་རྩོད་རྩོམ་གསུམ་བྱས་ནས།།
ཡོན་ཏན་རྒྱབ་བརྟེན་ཡོད་ན།།
ཁ་ཆུ་གསེར་ཆུར་རིན་དུས།།
སྐད་ཆ་བཤད་དབང་ཁྱོད་ཡོད།།
དེ་མིན་ད་ལྟའི་དུས་འདིར།།
སྐད་ཆ་མང་པོ་མ་བཤད།།
རང་མཚང་རང་གི་སྒོ་ཕུད།།
མྱིང་མེད་རང་གི་གླེན་རྟགས།།
ཐ་མ་རང་ཁ་རིན་ཆེན།།
གཞན་སེམས་དཀྲུགས་པའི་གཏེ་བོ།།།
དགེ་སྡུག་སྟོང་གི་འབྱུང་གནས།།
ཁྱེད་ལས་རྒྱལ་བའི་སྨོན་ལམ།།
མྱིང་མེད་ནས
༼༢༠༡༧.༡༠.༢༥ཉིན་དབྱི་གྲོང་ནས་སྦྱར།༽
གོ་བརྡ་ཨ་མའི་ཐལ་ལྕག
