དམར་ཁ་ཚ།

   ངའི་སེམས་ཤེས་པ་ནས་བཟུང་ང་ཨ་མ་ལ་དགའ་ཞིང་ཨ་མ་ཞིག་བྱེད་རྒྱུ་ལ་ཡང་དགའ་བོ་ཆེན་པོ་ཡོད།ཨ་མའི་བྱམས་བརྩེ་གཏིང་ཟབ་ཅིང་ཨ་མའི་ལྷག་བསམ་མཐའ་དཔོག་དཀའ་བ།ཨ་མའི་འགན་འཁྲི་ལ་སོགས་ཐེག་དཀའ་བ་ཞིག་ཡིན་是པ་ཤེས་མོད་ཀྱང་།ཨ་མ་བྱེད་རྒྱུར་མོས་པ་མ་ཟད་རླབ་ཆེན་ཞིག་གམ་ཚད་ལྡན་ཞིག་བྱེད་རྒྱུའི་འདུན་པ་ཡང་དྲགས་ཏུ་འཕྱོ་མྱོང་ལ། ཁྱེའུའི་སློབ་གསོ་དང་ཕྲུ་གུའི་སློབ་གསོ་སོགས་གཙོ་བོ་དྲ་ལམ་ཁག་དང་དཔེ་ཆ་རེ་གཉིས་ལ་ཆེད་དུ་བལྟས་ནས་དེའི་ཤེས་བྱ་སྐོར་གསོག་འཇོག་བྱེད་པར་འབད་བརྩོན་བྱེད་མྱོང་། ཡིན་ནའང་ལས་དབང་དང་ཐོད་པའི་ཁ་ཡིག་ཕྲ་མོ་ལས་ངེད་མ་བུ་གཉིས་ཀ་འདི་འདྲའི་གློ་བུར་བའི་གནས་ཚུལ་འོག་ནས་ཤ་ཁྲག་ཟུངས་གསུམ་ཅིག་ཅར་ཏུ་འདྲེས་འགྲོ་བར་བསམ་མ་ཐུབ་པ་ལ།དེ་སྔོན་ཡང་མ་འོངས་པ་ཞིག་ལ་ཞེས་ཁོག་ན་གྲ་སྒྲིག་གམ་འཆར་གཞི་ཏོག་ཙམ་ཡོད་པ་ལས་གཞན་པ་མ་ཡོད་པ་གཞིར་བཞག་སློབ་ཆེན་ནས་མཐར་ཕྱིན་མེད་པ་དང་།ཕ་མ་དང་ཕུ་ནུ་མིང་སྲིང་ཚོས་དཀའ་བའི་ཚེགས་དང་དཀོན་མོའི་རྒྱུ་ལ་སོགས་པས་ང་ལ་རམ་འདེགས་བྱས་མཐར་དང་སྤྱི་ཚོགས་དང་མི་ཁ་བསམ་ན་ང་ལ་གནོན་ཤུགས་རབ་དང་རིམ་པ་སྟེར་བ་མ་ཟད།ཉིན་ཞག་རེ་རེའི་ཁུར་བོ་བཞིན་ཇེ་ལྕི་ནས་ཇེ་ལྕི་ཡིན་པའི་ཚོར་བས་གཙེས་ནས་ཆུ་ཚོད་སྐར་མ་རེ་རེའི་ནང་དུ་ངའི་ཀླད་པའི་འཁོར་སྐྱོད་ཁྲོད་དུ་དྲན་མི་རུང་བ་྄དག་དྲན་ཡོང་ལ་བསམ་མི་ཆོག་པ་ཡང་གང་མང་བསམ་ཡོང་། ཡིན་ཡང་ལས་དབང་གི་དར་སྐུད་བདུད་པ་ཕྲ་མོ་ཞིག་ལ་གཏན་དུ་དཀྲོལ་རྒྱུ་མེད་པར་ཁྱོད་འུ་གཉིས་འཇིག་རྟེན་དཀར་འོག་འདི་ནས་ཚེ་གཅིག་གི་མ་བུ་ཡིན་པ་འདི་ལ་བཟློག་ཏུ་ཡེ་ནས་མེད་པ་སྙིང་དམར་པོའི་འཕར་ལྡིང་ཁྲོད་ན་གསལ་ལེར་འཆར་འདུག

          སྙིང་གི་བུ་༼བུ་མོ༽ཨ་མའི་སྲོག  ཟླ་དུ་མའི་སེམས་ཁུར་དང་ཞག་མང་པོའི་གཉིད་ཆག་བྱས་ནས་ངའི་ལྟོ་བ་ཇེ་འབུར་ཡིན་ལ་ཁྱོའི་ཕྲ་ཕུང་ཇེ་ཆེར་སོང་ན་ཡང་།ཁྱེད་ཀྱི་སྐུ་ཤ་རྒྱགས་པའི་ཡུམ་ཆེན་ལ་ཉིན་རེ་རེར་ཇེ་ཡང་ནས་ཇེ་ཡང་དུ་སོང་བའི་གནས་ཚུལ་ཞིག་ཀྱང་ཡོད་མྱོང་།ཡིན་ནའང་སྐྱོན་མི་འདུག ཁྱེད་ཀྱི་ཨ་ཕའི་དཀོན་མཆོག་གསུམ་དང་དགོན་ཁག་དུ་མར་སྐྱབས་བཅོལ་མང་པོ་བྱས་ཡོད་པ་མ་ཟད་ཁྱོད་ཟླ་བ་གཉིས་ལའང་མ་ལོན་པའི་གོང་དུ་སྐྱབས་བཅོལ་དཀའ་བསྒོའི་བྱེད་སའི་བླ་མའི་ལག་ནས་བདུད་པ་དང་བསྡིག་ཤུགས་སྔགས་ཆུ་སོགས་བླང་ནས་ཉར་ཚགས་བྱས་ཡོད་པ་དང་།ཁྱོའི་ཨ་མའི་གྲོགས་མོ་ཞིག་སྟེ་རྗེས་ཕྱོགས་ཁྱོས་ཀྱང་ཤེས་སྲིད་པའམ་ཤེས་དགོས་པ་རིག་བྱེད་འཚོ་ཟེར་བ་མོས་གློ་སྙིང་བྲང་གསུམ་ང་ལ་གཏད་ནས་སློབ་གསོའམ་ཁ་བརྡ་བགྲང་ལས་འདས་པ་བྱས་པ་དང་བསྟུན་ནས།ཁྱེད་ཀྱི་འཚར་ལོངས་ཀྱི་སྟངས་སྟབས་དག་སྙིང་གི་ཟབ་སར་ཉིན་རེ་ནས་ཉིན་རེར་དམ་དུ་ཟུག་སོང་བས་ང་ལ་སེམས་ཁུར་དང་ཉེས་སྙོམས་གང་ཡང་མེད་པར་ངའི་ཁོག་གི་སྙིང་དང་ཁྱོད་གཉིས་ལ་ལྟོ་བའི་ཡན་མན་ཞིག་ཁྱད་པ་ཙམ་ལས་གཞན་ནི་ཁྱད་པར་གང་ཡང་མེད་པར་གཉིས་སུ་མེད།

          སེམས་པུ་ ངེད་གཉིས་ཡོད་ཚད། ཁྱེད་ཀྱི་ཨ་ཕ་ཡོང་ཐེངས་རེ་རེར་ཁྱོད་ཡོད་སའི་ངའི་ལྟོ་བའི་ཐད་ནས་ང་ཐོན་ཡོད་ཕ་ཁོ་ཟེར་ཞོར་དགོད་སྒྲ་དང་འཛུམ་མདངས་འདྲེས་མའི་ཁྲོད་འོ་རེ་བྱས་པ་གོ་ཡོད་དམ།འགྲོ་ཁ་ཡང་ངའི་ལྟོ་བ་ལ་བྱིལ་བྱིལ་བྱེད་ཞོར་ཁ་ལག་སྐྱེ་འབྲས་ཡག་དགོས་ ནད་མེད་ཚེ་རིང་ཡིན་དགོས་སོགས་སྐད་ཆ་གང་མང་ཞིག་བཤད་ནས་འོ་འཇམ་ཞིག་གིས་བདེ་མོ་བཞག་པ་ཚོར་ཡོད་དམ་ཨ་མའི་གཅེས་ལོ་༼གཅེས་ལོ་མ༽།

                                         ཁྱེད་ཀྱི་ཨ་མ་ནས།      

                                         ༢༠༡༦/༡༡/༢༡                                                        

                                         མཚན་མོ༠༢:༠༠ལ།