端午期间，郊区大大细细嘅河涌锣鼓喧天，四围墟墟冚冚，啲龙船穿梭往来鬼死咁快，你话“屎艇快过龙船”简直系天方夜谭。但偏偏呢句话成日俾广州人引用，好似打麻将嗰阵，自己几飞叫胡都食唔出，而人哋绝章边卡窿竟然自摸，就会激到生虾咁跳----佢正牌“屎艇快过龙船”！
呢句咁俗嘅俗语出自边度呢？听啲上咗年纪嘅老人家讲：上世纪五、六十年代，广州城尤其河南啲住家都系冇厕所，家家户户都配备一、两个屎塔，每日天黑攞到屋外俾农民收集运去珠江边，装上屎艇棹返郊区，呢种专门装屎尿嘅艇就系屎艇。当时冇化肥，就当佢系宝，逢年过节农民重挨家挨户送来番薯、芋头以表谢意。有年端午，珠江边有班人正喺几条龙船上准备斗快，突然身后一阵冤崩烂臭，原来系同村二叔公而家先至棹屎艇急住返归，出于安全同敬老嘅考虑，龙船减速让路，点知嗰个二叔公得咗便宜重卖乖，大大声咁嗌：“我只屎艇快过你只龙船，屎艇快过龙船啰！”二叔公把声激荡喺河面上，龙船同岸上啲人都笑到碌地。
重有一个版本话二叔公棹屎艇返归，俾两条龙船阻住，二叔公请佢哋让让水路，龙船上有条友食紧碌柚，话：“冇睇食紧嘢咩，你只臭气冲天嘅屎艇重系兜村尾过啦。”兜村尾远好多啵，二叔公心生一计，佢问大家：“你哋话碌柚大，定系龙眼大？”船上嘅人都笑啦：“梗系碌柚大啦！”二叔公话：“咁我哋输赌。如果我证明龙眼大过碌柚，就请你哋让路，重要大嗌三声‘屎艇快过龙船’。对方应承咗，食紧碌柚条友攞出一个碌柚仔举喺手话：“就呢个都赢成条街啦！”二叔公话：“唔该你将碌柚同龙船头嗰只龙嘅眼睛比较下。”咦！结果系龙眼睛大啲。嗰条友话：“系呢个龙眼睛啊，我哋重以为系水果龙眼添！”不过佢突然攞出个鬼死咁大嘅沙田柚，话：“龙眼重系大唔过碌柚！”龙船上顿然一片欢呼，转而再睇二叔公点应对。佢不慌不忙又攞出一个装猪嘅竹笼，一路大嗌睇清楚嚟，一路将个沙田柚由上向笼眼塞，结果轻易就塞咗入去，重即刻从底下嘅笼眼跌番出嚟。哗，真系龙（笼）眼大过碌柚啵！龙船上啲人都俾二叔公嘅智慧折服，即刻让开水路。二叔公听住“屎艇快过龙船”嘅嗌声，超越龙船而去。
