བློ་ལྡན་བློ་ཡི་དགའ་ཚལ་ན།།
བློ་གྲོས་འབྱེད་པའི་དཔྱད་གཞི་ཙམ།།
བློ་མཆོག་མངའ་བའི་དྲང་སྲོང་མདུན།།
བློ་སྐྱེད་ཐོན་ཕྱིར་འབྲི་ལ་སྤྲོ།།
ཇི་སྐད་དུ།བློ་ཞེས་བྱ་བ་ཤེས་རབ་སྟེ།།བླང་དོར་མ་ནོར་འབྱེད་པ་ཡིན།།མིག་དང་འདྲ་བ་འདི་མེད་ན།།ཡོན་ཏན་གཞན་གྱི་གོ་སྐབས་འགག།
ཅེས་མཁས་པའི་གཙུག་རྒྱན་གྲུབ་པའི་ཁྱུ་མཆོག་མི་ཕམ་ཕྱོགས་ལས་རྣམ་རྒྱལ་རྒྱ་མཚོའི་ལེགས་གསུང་དྲི་མ་མེད་པའི་དགོངས་དོན་ཐུན་མིན་མ་ཡིན་པའི་སྒོ་ནས་ཕྱོགས་ཙམ་ཞིག་རྟོགས་པའི་སླད་དུ་བློ་རིགས་ཀྱི་རྣམ་བཞག་ཅུང་ཙམ་སྤྲོ་བར་འདོད་དོ།།དེ་ལ་དང་པོ་གཞན་འདོད་བཀོད་པའི་སྒོ་ནས་དེའི་ལུགས་དགག།རང་ལུགས་བཞག་པའི་སྒོ་ནས་ལུང་རིགས་བཀོད།།ས་ལུགས་འགལ་མེད་སྒོ་ནས་མཇུག་བསྡུའོ།།དེ་ཡང་དང་པོ་ག
ཞན་འདོད་འགོད་པ་དང་།དེ་དགག་པ་གཉིས་ལས་དང་པོ།ཚད་མ་སྔ་རབས་པ་ཁ་ཅིག་ན་རེ།བློ་ཡི་ངོ་བོའི་སྒོ་ནས་འབྱེད་བ་ལ།།མ་རྟོགས་ལོག་རྟོག་ཐེ་ཚོམ་རྣམ་གསུམ་དང་།།མངོན་སུམ་རྗེས་དཔག་ཡིད་དཔྱོད་བཅད་ཤེས་བཞི།།ཞེས་ངོ་བོའི་སྒོ་ནས་དབྱེ་བ་འདོད་པ་ལ་ས་པཎ་གྱིས་རིགས་གཏེར་ལས།ཡིད་དཔྱོད་སྣང་ལ་མ་ངེས་དང་།།བཅད་ཤེས་ལོག་ཤེས་ཐེ་ཚོམ་ལྔ།།དེའི་སྟེང་དུ་མངོན་སུམ་ཚད་མ་དང་རྗེས་དཔག་གཉིས་ཏེ་བློ་རིགས་བདུན་འདོད་ལ་དང་པོ་ཡིད་དཔྱོད་དགག་པ་ལ་སྔ་རབས་པ་དག་གིས་ཡིད་དཔྱོད་རང་གི་ངོ་བོ་དང་།དབྱེ་བ་རེ་རེའི་ནས་སྨྲས་པར་འདོད་དེ།རྟགས་ལ་མ་བརྟེན་པའི་ལྐོག་གྱུར་གྱི་དོན་བདེན་པ་གསར་དུ་ངེས་པའི་རིགས་པ་ཞེས་བརྗོད་པ་ལ།
གཉིས་པ།
གལ་ཏེ་རྒྱུ་མཚན་ཕྱིན་ལོག་དང་མ་ངེས་པའི་རྒྱུ་མཚན་ཅན་གྱི་ཡིད་དཔྱོད་གཉིས་པོ་དེ། རྟགས་མ་གྲུབ་པ་ལ་སོགས་པའི་ལྟར་སྣང་གསུམ་དུ་མི་འདུ་ན། ཡིད་དཔྱོད་སྐྱེས་པའི་རྟགས་ཞེས་པ་གཏན་ཚིགས་ལྟར་སྣང་བ་བཞི་བ་ཞིག་སྲིད་པར་འགྱུར་ལ། ཡིད་དཔྱོད་དེས་དོན་བདེན་པ་གསར་དུ་ངེས་ཀྱང་ད་རུང་ཚན་མ་མིན་ན། འོ་ན། རྗེས་སུ་དཔག་པའང་ཚད་མ་མིན་པར་ཅི་ཕྱིར་མི་འགྱུར། དོན་བདེན་པ་ངེས་པ་ཡོད་ཀྱང་དེས་སྒྲོ་འདོགས་མི་གཅོད་ན། ངེས་སྒྲོ་འདོགས་གཉིས་པོ་ཕན་ཚུན་གནོད་བྱ་གནོད་བྱེད་མིན་པར་འགྱུར་ལ་འདོད་ན་གཞུང་དང་རིགས་པར་འགལ་ལོ།། གལ་ཏེ་དོན་ངེས་པ་ནི་མེད་ཀྱང་ཁྲོན་པ་ན་ཆུ་ཡོད་དམ་སྙམ་པ་དོན་དུ་བདེན་པའི་ཡིད་དཔྱོད་དང་མེད་དམ་སྙམ་པ་བརྫུན་པ་ལོག་པའི་ཤེས་པ་དང་། ཡོད་དམ་མེད་སྙམ་པ་སོམ་ཉིའི་བློ་གསུམ་ཡོད་པ་མི་འགལ་ཟེར་ན། བདེན་པ་ངེས་པ་མེད་ན་ཡིད་དཔྱོད་ཉམས་ཏེ་ངེས་པ་དོན་མཐུནདེ་འདྲའིབློ་དེ་ཉིད་དུ་ཁས་བླངས་བས་སོ། །ཡོད་དམ་མེད་སྙམ་པ་གཉིས་པོ་ཡིད་དཔྱོད་དང་ལོག་ཤེས་གཉིས་སུ་འགྱུར་ན་དེ་གཉིས་ལས་ལོགས་སུ་ཐེ་ཚོམ་རང་རྐྱ་བ་ཞིག་འཇོག་པར་དཀའོ།། ཡང་ན་ཁྱོད་ཀྱིས་ལྐོག་གྱུར་དོན་མཐུན་དུ་ངེས་པ་བདེན་པའི་ཡིད་དཔྱོད་འདོད་པ་ལྟར། དེ་ལས་ལྡོག་པ་རྫུན་པའི་ཡུལ་ཅན་ལོག་པའི་ཡིད་དཔྱོད་ཡིན་ནོ་ཞེས་སྨྲ་བར་ཡང་ཅིས་མི་འཐད། དེ་ལྟར་འདོད་དོ་ཞེ་ན་ཡིད་དཔྱོད་ནི་དོན་མཐུན་བདེན་པ་ཡིན་ནོ་ཞེས་འདོད་པ་ཉམས་སོ། །ལོག་པ་དེ་གཉིས་ཀར་དོགས་པས་ཡིད་དཔྱོད་མིན་ཟེར་ན་འོ་ན་སྔ་མའང་དཔྱད་ན་གཉིས་ཀར་དོགས་པས་ཡིད་དཔྱོད་མིན་པར་མཚུངས་སོ། །གལ་ཏེ་ཕྱོགས་གཉིས་ཀར་དོགས་ནས་ད་རུང་ཐེ་ཚོམ་མ་ཆོད་ན་ནི་ཐེ་ཚོམ་འགྱུར་གྱི་ཡིད་དཔྱོད་དུ་མི་རུང་ལ། གལ་ཏེ་ཐེ་ཚོམ་དུ་མི་འགྱུར་བར་དོན་མཐུན་ངེས་པ་དེ་ཡིད་དཔྱོད་ཡིན་པར་སྲིད་ན་དོན་མི་མཐུན་ཡང་ལོགས་སུ་འགྱུར་བས་ཡིད་དཔྱོད་སོགས་ལྔར་འདོད་པའི་གྲངས་ངེས་འཇིག་ལ།སྐྱོན་མེད་དེ་ཡིད་དཔྱོད་རྫུན་པ་ལོག་ཤེས་ཡིན་ཟེར་ན་འོ་ན་ཡིད་དཔྱོད་ཀྱང་བདེན་པ་ངེས་པ་ཡིན་པའི་ཚད་མ་ཉིད་དུ་འགྱུར་བར་མཚུངས་པའི་ཕྱིར་རོ། གཉིས་པ་སོ་སོར་དགག་པ་ལ། རྒྱུ་མཚན་མེད་པའི་ཡིད་དཔྱོད་དགག་པ། རྒྱུ་མཚན་ཕྱིན་ཅི་ལོག་པའི་ཡིད་དཔྱོད་དགག་པ། ལུང་ཆོས་ཡིད་དཔྱོད་དུ་འདོད་པ་དགག་པ་གསུམ། དང་པོ། གལ་ཏེ་ཁྲོན་པར་ཆུ་ཡོད་སྙམ་པ་སོགས་ཡོད་པའི་རྒྱུ་མཚན་མེད་པའམ་མ་བཟུང་བ་ཡི། ཡིད་དཔྱོད་ཡུལ་དོན་མཐུན་དུ་ངེས་པའི་བདེན་པ་ཡིན་ན་རང་གི་འོག་ན་གཏེར་ཡོད་སྙམ་པ་སོགས་བློ་ཀུན་བདེན་པར་འགྱུར་ཏེ།རྒྱུ་མཚན་མེད་ཀྱང་བདེན་པར་ཁས་བླངས་བས་སོ། །གཉིས་པ། གལ་ཏེ་གཞལ་བྱས་མི་རྟག་པ་བསྒྲུབ་པ་སོགས་ཕྱིན་ཅི་ལོག་པའི་རྒྱུ་མཚན་ཅན་ཀུན་ཀྱང་ཁྱོད་ལྟར་ན་ཡིད་དཔྱོད་ཡིན་དགོས་ནའང་སློབ་དཔོན་གྱིས་རྟགས་མ་ངེས་པའི་བློ་དེ་དག་ཐེ་ཚོམ་དུ་བསྡུས་པས་ན་གཞུང་དང་འགལ་ལོ། །གསུམ་པ། རང་དང་གཞན་གྱི་སྡེ་བའི་ལུང་ལས་རང་གི་བརྗོད་བྱ་རྟོགས་པའི་བློ་དེ་ནི་ཚད་མ་དང་མ་རྟོགས་ལོག་རྟོག་ཐེ་ཚོམ་སྟེ་བློ་རིགས་བཞི་པོ་གང་ཡང་རུང་བར་འདུས་པ་ཡིན་གྱི་ཡིད་དཔྱོད་དེ་དག་ལས་གཞན་ལོགས་སུ་བ་ཞིག་ཡོད་པ་མ་ཡིན་ནོ། །
དེ་འདྲ་བའི་ཡིད་དཔྱོད་དེ་ཆོས་ཅན།ཁྱོད་རིགས་པའི་ལམ་ནས་སྒྲུབ་ཏུ་མེད་པར་ཐལ།རྟགས་ལ་ལྟོས་ཞེས་བརྗོད་ན་མི་འཐད་པ་གང་ཞིག་རྟགས་ལ་མ་ལྟོས་ན་ཡང་ཁྱོད་མི་འཐད་པའི་ཕྱིར།དེ་འདྲ་བའི་ཡིད་དཔྱོད་དེ་ཆོས་ཅན།ཁྱོད་ཐོག་མར་རྟགས་ལ་ལྟོས་པའི་སྒོ་ནས་གཞག་མི་རིགས་ཏེ།རང་འགྲེལ་ལས།རྟགས་ལ་ལྟོས་ན་ཡང་དག་གམ།།ལྟར་སྣང་གསུམ་ལས་འདས་བ་མེད།།རྒྱུ་མཚན་གྱི་ཡིད་དཔྱོད་གཉིས།།ལྟར་སྣང་གསུམ་དུ་མི་འདུན།།གཏན་ཚིགས་ལྟར་སྣང་བཞི་བ་འགྱུར།།ཞེས་གསུངས་པ་བཞིན་དུ་གལ་ཏེ་ཡིད་དཔྱོད་རྟགས་ལ་ལྟོས་ན་བཞི་ལས་མི་འདའ་སྟེ། ཆོས་ཅན་ལ་རྟགས་མ་གྲུབ་ན་མ་གྲུབ་པའི་རྟགས་ལྟར་སྣང་ངོ་། །གྲུབ་ན་མཐུན་ཕྱོགས་ཁོ་ན་ལ་འཇུག་ན་ཡང་དག །མི་མཐུན་ཕྱོགས་ཁོ་ན་ལ་འཇུག་ན་འགལ་བ། གཉིས་ཀ་ལ་འཇུག་པའམ་མི་འཇུག་ན་མ་ངེས་པའོ། །དཔེར་ན་ཁུང་ན་ཁྲོན་པ་ན་ཆུ་ཡོད་དེ་ཅིའི་ཕྱིར་ཞེས་དྲིས་པ་ན། རྟགས་མི་འགོད་པར་ཡོད་དོ་ཞེས་དམ་བཅའ་རྐྱང་པ་ནི་ཐེ་ཚོམ་དུ་སྔར་བཤད་ཟིན་ལ། རྒྱ་མཚོའི་ངོགས་ཡིན་པ་ལ་སོགས་པ་མ་གྲུབ་པ་བཀོད་ན་ཕྱོགས་ལ་མཐུ་མེད་པས་མ་རྟོགས་པ་ཉིད་ཡིན་པའི་ཕྱིར་ངེས་པ་མི་སྲིད་དོ། །ཆུ་འདྲེན་པ་ལ་སོགས་པའི་རྟགས་ངེས་ན་ཡང་དག་གོ །དུ་བ་ལ་སོགས་པ་བཀོད་ན་འགལ་བའོ། ། སྔ་ཕྱིའི་ཆུ་ལེན་པ་ལ་སོགས་པ་བཀོད་ན་མ་ངེས་པའི་རྟགས་སམ་བློ་བཞིར་མ་འདུས་པའི་ལྐོག་གྱུར་རྟོགས་པའི་ཡིད་དཔྱོད་མི་སྲིད་དོ།།ཡིད་དཔྱོད་འགལ་མ་ངེས་མ་གྲུབ་གསུམ་ལ་བརྟེན་པའི་བློ་གསུམ་དུ་མི་འདུ་ན་ཡིད་དཔྱོད་སྐྱེད་པའི་རྟགས་ཞེས་བྱ་བ་ལྟར་སྣང་བཞི་པ་སྲིད་པར་འགྱུར་རོ། །ཡིད་དཔྱོད་ལྟར་སྣང་མ་ཡིན་ན། ཚད་མ་གསུམ་པ་སྲིད་པར་འགྱུར། ལྟར་སྣང་གསུམ་ལ་བརྟེན་པའི་བློ་གསུམ་དུ་ནི་མི་འདུ་བ་འགྱུར་བའི་ཕྱིར་རོ།།
གཉིས་པ་སྣང་ལ་མ་ངེས་པ་དགག་པ་ནི།གལ་ཏེ་ཡུལ་མངོན་སུམ་དུ་སྣང་ལ་མ་ངེས་པ་ཉིད་ཀྱི་ཕྱིར་ཚད་མ་མིན་ན་མངོན་སུམ་ཀུན་ཀྱང་ཚད་མ་མིན་པར་འགྱུར་ཏེ།རྒྱུ་མཚན་ནི་རང་མཚན་མངོན་སུམ་ལ་ངེས་པ་ཉིད་ནི་གཞུང་ལས་བཀག་ཕྱིར་ཏེ་རང་མཚན་དེར་སྣང་བའི་སྟོབས་ཀྱིས་ཚད་མར་བཞག་གི་ངེས་པ་མིན་པར་འཆད་པར་འགྱུར་རོ། །
གལ་ཏེ་སྣང་ལ་མ་ངེས་པ།།ཚད་མ་མིན་ན་མངོན་སུམ་ཀུན།།ཚད་མ་མིན་འགྱུར་མངོན་སུམ་ལ།།ངེས་པ་ཉིད་ནི་བཀག་ཕྱིར་རོ།།ཞེས་གསུངས་བ་བཞིན་དུ་སྣང་ལ་མ་ངེས་པ་ཚད་མ་མིན་ན་མངོན་སུམ་ཐམས་ཅད་པོ་ཚད་མ་མ་ཡིན་པ་ཉིད་དུ་འགྱུར་ཏེ།རིགས་གཏེར་རྩ་འགྲེལ་ལས། གལ་ཏེ་སྣང་ལ་མ་ངེས་པ། །མངོན་སུམ་ལ་མཚན་ཉིད་ཞུགས་པའི་ཕྱིར་དེ་ཚད་མ་མ་ཡིད་པར་འགྱུར་ཏེ། རྣམ་འགྲེལ་སྟོང་ཕྲག་ཕྱེད་དང་བཞི་པ་ལས། ད་ནི་ཇི་ལྟར་མ་ངེས་པ་མངོན་སུམ་གྱིས་ཀྱང་གཟུང་བ་ཡིན་ཞེ་ན། མངོན་སུམ་ནི་གང་གིས་ཀྱང་ངེས་པར་བྱེད་པ་མ་ཡིན་ཏེ། དེས་གང་ཞིག་འཛིན་པ་དེའང་ངེས་པས་ནི་མ་ཡིན་ནོ། ། འོ་ན་ཅི་ཡིན་ཞེ་ན་དེར་སྣང་བས་སོ། །དེས་ན་ངེས་པ་དང།མ་ངེས་པའི་དབང་གིས་མངོན་སུམ་གྱིས་འཛིན་པ་དང་མི་འཛིནཔ་དག་མ་ཡིན་ནོ། །ངེས་པ་རྣམས་ཀྱིས་ནི་དེ་ལྟ་མ་ཡིན་ཏེ། འགལ་ཞིག་ངེས་ཀྱང་གཞན་མ་ངེས་པས་འཇུག་པ་ཐ་དད་པས་འཛིན་པ་དང་མི་འཛིན་པ་ཡིན་ནོ། །ཞེས་སོ། །འོ་ན་མ་ངེས་ན་མངོན་སུམ་ཚད་མར་ཇི་ལྟར་འགྱུར་ཞེ་ན། འདི་ལ་འོག་ཏུ་བཤད་པར་བྱའོ། །གཉིས་པ་བྱེ་བྲག་ཏུ་ཡུལ་རྣམ་པ་མི་གསལ་བའི་སྣང་ལ་མ་ངེས་པ་མི་འཐད་དེ། རྫས་གཅིག་ལ་རྣམ་པ་གསལ་མི་གསལ་འགལ་བའི་ཕྱིར་རོ། །འོ་ན་བུམ་པ་མཐོང་བའི་ཚེ་དེའི་སྐད་ཅིག་རྣམ་པ་མི་གསལ་བ་མ་ཡིན་ནམ་ཞེ་ན། དེ་ནི་འཁྲུལ་པའི་རྒྱུ་མཚན་གྱིས་ཟིན་པས་མ་ངེས་པ་ཡིན་ཏེ། རྣམ་འགྲེལ་ལས། གཟུགས་ཆོས་མཐུན་པ་མཐོང་བ་ལས། །ཉ་ཕྱིས་ལ་དངུལ་སྣང་བ་ལྟར། ། གལ་ཏེ་འཁྲུལ་པའི་རྒྱུ་མཚན་གྱིས། །ཡོན་ཏན་གཞན་སྦྱོར་མི་བྱེད་ན། །ཞེས་གསུངས་པས་སོ། །འོ་ན་མཐོང་ཡང་གསལ་བ་མེད་པའི་ཕྱིར་རོ་ཞེས་ཀྱང་བཤད་པ་མ་ཡིན་ནམ་ཞེ་ན། དེ་ནི་ཡུལ་མི་གསལ་བས་མ་ཡིན་གྱི་འདྲ་བ་གཞན་འབྱུང་ལ་སོགས་པ་འཁྲུལ་པའི་རྒྱུ་མཚན་གྱི་སྒོ་ནས་བློས་གསལ་བར་འཛིན་མ་ནུས་པས་གཞན་སེལ་གྱི་སྒོ་ནས་ངེས་པར་བྱ་བ་ལ་དགོངས་པ་ཡིན་ནོ། །དེས་ན་ཡུལ་མི་གསལ་བ་དང་བློས་གསལ་མི་ནུས་པ་གཉིས་འདྲེས་པར་མི་བྱའོ།།
གསུམ་པ་བཅད་ཤེས་དགག་པ་ནི།རིགས་གཏེར་ལས། བཅད་ཤེས་རིགས་པས་མཐའ་བཅད་ན། ། མ་རྟོགས་པ་དང་ལོག་རྟོག་དང་། །ཡང་ན་ཚད་མ་ཉིད་འགྱུར་གྱི། །དེ་ལས་གཞན་པའི་བློ་མི་སྲིད།།ཅེས་སོགས་གསུངས་པས་རིགས་པ་དང་མི་མཐུན་པ་དག་དགག་མོད།འོན་ཀྱང་ཐེ་ཚོམ་སོགས་རང་ལུགས་དང་ཧ་ཅང་མཐུན་ཞིང་ལུང་རིགས་དང་འགལ་བའང་མེད་པའི་ཕྱིར་ན་དགག་པ་ཡང་མ་བྱས་སོ།།
དེ་མི་འཐད་དེ།སྤྱིར་ཡིད་དཔྱོད་རྟགས་ལ་གཏན་ནས་མི་ལྟོས་པ་ཡིན་ན་ནི་དམ་བཅའ་ཙམ་ཡིན་གྱི་དེ་ལྟར་གྲུབ་མ་གྲུབ་ལ་བརྟགས་ན་ཐེ་ཚོམ་དུ་འགྱུར་ཏེ་ངེས་པ་མི་སྲིད་པས་ཐེ་ཚོམ་བག་ཉལ་ཡིན་ནོ།། གལ་ཏེ་རྟགས་ལ་ལྟོས་ན་རྟགས་ཡང་དག་གམ། ཡང་ན་རྟགས་ལྟར་སྣང་འགལ་མ་ངེས་མ་གྲུབ་གསུམ་པོ་གང་རུང་སྟེ་དེ་བཞི་ལས་འདའ་བ་མེད་དོ།། བཅད་ཤེས་དགག་པ་སྤྱི་དང་བྱེ་བྲག་ཏུ་དགག་དང་མངོན་སུམ་གཉིས་གཞི་མཐུན་དུ་འདོད་པ་དགག་པ་གཉིས་ལས་དང་པོ།བཅད་ཤེས་ཞེས་བྱ་བ་དེ་རིགས་པས་མཐའ་བཅད་ན། རང་ཡུལ་ཚད་མས་བཅད་ཟིན་ཡིན་པའི་ཐེ་ཚོམ་མ་ཡིན་ལ། དེ་ཡི་ལྷག་མ་མ་རྟོགས་པ་དང་ལོག་རྟོག་དང་། ཡང་ན་ཚད་མ་ཉིད་དེ་གསུམ་པོ་གང་རུང་ཞིག་ཏུ་འགྱུར་དགོས་པ་ཡིན་གྱི། གཞན་དུ་མི་འཐད་དེ།རྒྱུ་མཚན་བློ་རིགས་བཞི་པོ་དེ་ལས་གཞན་པའི་བློ་མི་སྲིད་པ་དེས་ན་ཚད་མའི་ཡུལ་དྲན་པ་ཙམ་ལས་རང་ལ་རྟོགས་བྱའི་ཡུལ་མེད་པའི་ཕྱིར་རོ།། གཉིས་པ་ལ་མངོན་སུམ་དང་བཅད་ཤེས་འགལ་བའི་གཞི་མཐུན་མི་སྲིད་པས་དགག་པ་དང་།དབང་པོ་རིགས་ལ་ཚད་མ་ཡིན་པ་དགག དེའི་དོན་བསྡུ་གསུམ་དང་པོ། མངོན་སུམ་ནི་ངོ་བོ་རྟོག་བྲལ་ཡུལ་རང་མཚན་དུས་ད་ལྟ་བ། འཛིན་སྟངས་གསལ་བ་མ་འདྲེས་པ་ཡིན་ལ། བཅད་ཤེས་ནི་ངོ་བོ་རྟོག་པ། ཡུལ་སྒྲ་དོན་དུས་འདས་པ་དྲན་པ་འཛིན །སྟངས་མི་གསལ་བ་འདྲེས་པ་འཛིན་པ་ཡིན་པའི་ཕྱིར་ན་དེ་ལྟ་བུའི་ཡུལ་དུས་འཛིན་སྟངས་འགལ་བ་ལ་མངོན་སུམ་ཡང་ཡིན་ལ་བཅད་ཤེས་ཀྱང་ཡིན་པའི་གཞི་མཐུན་པ་ནི་ག་ལ་སྲིད་དོ།།གཉིས་པ་ནི།
དབང་པོ་རིགས་པར་མི་འཐད་དེ།དབང་པོ་རང་ཉིད་བེམ་བོ་ཡིན་པའི་ཕྱིར་རོ།།གསུམ་པ་ནི་མདོར་མ་བློ་རིགས་བདུན་གྲངས་ཉིད་དུ་བཞག་ན་མི་འཐད་པ་བསྟན་པ་ཡིན་ནོ།།
གཉིས་པ་ཤེས་བྱེད་ཀྱི་བློ་ལ།
མཚན་ཉིད། དབྱེ་བསྡུ དེ་དག་དོན་གཏན་ལ་འབབ་པ་གསུམ། དང་པོ། བློ་ཡི་མཚན་ཉིད་ནི་གསལ་ཞིང་རིག་པ་ཡིན་ལ། གཉིས་པ་ཡུལ་སོགས་སྒོ་ནས་དུ་མར་འགྱུར་ཏེ་ཡུལ་གྱི་སྒོ་ནས་རང་སྤྱི་འཛིན་པའི་རྟོག་བཅས་རྟོག་མེད་མེད་གཉིས། ངོ་བོའི་སྒོ་ནས་འཁྲུལ་མ་འཁྲུལ་སོགས་དབྱེ་སྒོ་མང་ཡང་ཡུལ་ཅན་གྱི་ཤེས་པའི་སྒོ་ནས་རང་རིག་གཅིག་པུའི་མཐར་འདུའོ། །དེས་ན་རང་ལུགས་ཚད་མིན་གྱི་བློའི་མཚན་ཉིད་ཤེས་པ་གང་ལ་མི་བསླུ་བ་མ་གྲུབ་དེ་ནི་ཚད་མ་མིན་པ་ཡིན་ནོ། །གཉིས་པ། དེ་ལ་དབྱེ་ན་མ་རྟོགས་ལོག་རྟོག་ཐེ་ཚོམ་སྟེ། ཚད་མའི་འགལ་ཟླ་ཚད་མིན་ལ་ནང་གསེས་དབྱེ་བ་རྣམ་པ་གསུམ་ཡོད་པ་དེ་ནི་ཚད་མིན་གྱི་བློ་ཡུལ་ལ་འཇུག་ཚུལ་གྱི་སྒོ་ནས་གྲངས་དེ་ལྟར་ངེས་པ་ཉིད་དུ་ཕྱེ་བ་ཡིན་ཏེ།བློའི་འཇུག་ཚུལ་མཐའ་དག་བཞི་ལས་གཞན་མི་སྲིད་ལ་གཅིག་ཚད་མ་ཡིན་ལ་ཚད་མིན་ལ་འཇུག་ཚུལ་གསུམ་ཐོབ་ཅིང་དེའི་གྲངས་ངེས་དང་གཏན་ཚིགས་ཀྱི་སྐྱོན་གསུམ་དང་རྣམ་གཅོད་གསུམ་དུ་གྲངས་ངེས་པ་སོགས་གནད་གཅིག་གོ །ངོ་བོའི་སྒོ་ནས་བསྡུ་ན་ལོག་རྟོག་དང་ཐེ་ཚོམ་གཉིས་ཀྱང་མ་རྟོགས་པ་ཡིན་པས་མ་རྟོགས་པ་དེ་གཅིག་པུར་འདུའོ། ། མ་རྟོགས། ལོག་རྟོག ཐེ་ཚོམ་གསུམ། དང་པོ་ལ་མཚན་ཉིད། དབྱེ་བ་གཉིས། དང་པོ། དེ་ཡང་ཡུལ་དངོས་དེ་དང་དེ་མིན་ཕྱིན་ལོག་ཏུ་འཛིན་པ་གཉིས་ཀྱིས་སྟོང་པས་ཚད་མ་དང་ལོག་རྟོག་ཆོད་ལ་དེ་གཉིས་བསྡོམས་པའི་ཤུགས་ལ་ཐེ་ཚོམ་ཆོད་པས་ན་བློ་དེ་འདྲ་བ་མ་རྟོགས་པ་ཡིན་ནོ། ། གཉིས་པ། དེ་ལ་དབྱེ་ན་གསུམ། ཡུལ་དེ་ལ་བློ་གཏན་མ་ཞུགས་པ་དང་ཞུགས་ཀྱང་ཚོལ་བའི་བྱ་བ་མ་རྫོགས་པ་དང་། ཚོལ་བའི་བྱ་བ་དཔྱད་པ་རྫོགས་པར་གྱུར་ཀྱང་བློའི་ཡུལ་དུ་མ་བྱུང་ནས་མ་རྙེད་པའོ། །གཉིས་པ་ལ་མཚན་ཉིད་དབྱེ་བ་གཉིས། དང་པོ། ཡུལ་དེ་ཉིད་དུ་འཛིན་པ་ལ་དེ་མིན་པའི་ཚད་མ་གཞན་གྱིས་གནོད་པ་ཡོད་པ་ནི་ལོག་ཤེས་ཡིན་ནོ། །གཉིས་པ། དེ་ལ་དབྱེ་བ་གཉིས་ཡོད་དེ། ལོག་ཤེས་ཡིད་གཉིད་ཀྱིས་བསླད་པ་ལྟ་བུ་དང་ནི་རྟོག་མེད་དབང་ཤེས་འཁྲུལ་བ་ཟླ་བ་གཉིས་ལྟ་བུ་དེ་གཉིས་ཡོད་ཅིང་དེ་ལའང་སོ་སོར་ཕྱེ་ན་རྟོག་མེད་ལ་དབང་ཡིད་འཁྲུལ་བ་གཉིས། རྟོག་པ་ལ་ཡུལ་དུས་རྣམ་པ་འཁྲུལ་བ་གསུམ་སྟེ་རྣམ་པ་ལྔ་ཡོད་དོ། ། གསུམ་པ་ལ་མཚན་ཉིད། དབྱེ་བ་གཉིས། དང་པོ། ཡུལ་དེ་ཡིན་པར་འཛིན་ན་ཡང་དེའི་བྱེད་པ་མ་ཉམས་བཞིན་དུ་དེ་མིན་དུ་འཛིན་པའི་འཛིན་སྟངས་ཀྱང་དེ་ལ་སྲིད་ཅིང་ཡོད་རུང་བའི་བློ་དེ་ཡིན་ནོ། ། གཉིས་པ། དབྱེ་ན་གཉིས་ཡོད་དེ།ཐེ་ཚོམ་དངོས་སུ་ཞུགས་པ་མངོན་དུ་གྱུར་པ་དང་དངོས་སུ་ཐེ་ཚོམ་མ་ཞུགས་ཀྱངབརྟག་ན་ཐེ་ཚོམ་པ་བག་ལ་ཉལ་གཉིས་ཡོད་ལ། མངོན་གྱུར་ལའང་སྒྲ་རྟག་གམ་མི་རྟག་ལྟ་བུ་ཕྱོགས་གཉིས་པོ་ཆ་མཉམ་པ་དང་ཕྱོགས་རེ་རེ་བ་ཤས་ཆེར་འཛིན་པ་དོན་འགྱུར་དང་དོན་མི་འགྱིར་གཉིས་ཡོད་དོ། ། གསུམ་ས་ལུགས་དང་འགལ་བ་མེད་ཚུལ་མདོར་བསྡུ་ན་ཚད་མའི་ཤེས་པ་མངོན་རྗེས་གཉིས་པོ་ཡང་། དོན་དུ་ཡུལ་ཅན་རང་རིག་ཚད་མ་ཁོ་ནར་འདུས་ཤིང་ཚད་མ་མིན་པ་གསུམ་པོ་ཡང་མ་རྟོགས་པ་ལས་དོན་གཞན་མིན་པར་ཞེས་པར་བྱ་དགོས་སོ།།་མ་ཟད་ངེད་ཅག་ལ་བཀའ་དྲིན་འགྲན་ཟླ་དང་བྲལ་པའི་ཀུན་མཁྱེན་མི་ཕམ་རིན་པོ་ཆེས།མཁས་པའི་ཚུལ་ལ་འཇུག་པའི་སྒོ་ལས།ཡུལ་ཅན་བློ་ཡི་དབྱེ་བ་ལ། །སྣང་ལ་མ་ངེས་ཡིད་དཔྱོད་དང་།། མ་རྟོགས་ལོག་རྟོག་ཐེ་ཚོམ་དང་། །མངོས་སུམ་རྗེས་དཔག་ཚད་མ་གཉིས།། བཅད་ཤེས་དང་ནི་བདུན་དུ་དབྱེ། །བློ་ཀུན་མ་རྟོགས་ལོག་རྟོག་དང་། །ཐེ་ཚོམ་ཡང་དག་རྟོགས་བཞིར་འདུ།།ཞེས་དང་དེའི་རྩ་བ་ལས།ཡང་ཡུལ་ཅན་བློ་ལ་རིགས་བཞི་སྟེ། མ་རྟོག། ལོག་རྟོགས། ཐེ་ཚོམ། ཡང་དག་པར་རྟོགས་པའོ། །མ་རྟོགས་པའི་བྱེ་བྲག་ལ་མངོན་སུམ་སྣང་ལ་མ་ངེས་པ་དང་། རྗེས་དཔག་ཚད་མ་ལ་བརྟེན་པའི་ཡིད་དཔྱོད་གཉིས་ནི། ཡིད་ཤེས་ལ་ངེས་པ་འདྲེན་མི་ནུས་པའི་ཆ་ནས་བཞག་པའོ། །
ལོག་རྟོག་ནི་ཕྱིན་ཅི་ལོག་ཏུ་འཛིན་པའོ། །ཐེ་ཚོམ་ནི་བློ་རྩེ་གཉིས་སུ་འཇུག་པ་ཕྱོགས་མ་ཆོད་པའོ། །ཡང་དག་པར་རྟོགས་པ་ལ་རྒྱུ་མངོན་སུམ་ཚད་མ་དང་། རྗེས་དཔག་ཚད་མ་གཉིས་སོ། །དེ་གཉིས་ཀྱི་འབྲས་བུ་བཅད་ཤེས་ཏེ་ངེས་ཤེས་སོ། །ཞེས་གསུངས་བ་བཞིན་དུ་འཇམ་མགོན་ས་སྐྱ་པཎ་གྱིས་ཀྱང་བློ་རིགས་ལ་བདུན་དུ་འདོད་པར་སེམས་སོ།།འོ་ན་ཅིའི་ཕྱིར་འོག་ནས་ཡིད་དཔྱོད་དང་སྣང་ལ་མ་ངེས་པ་བཅད་སོགས་དགག་པར་མཛད་ཅེ་ན།དེ་དག་ནི་སྔ་རབས་པ་ལྟར་དུ་འདོད་དེ།གྲངས་ངེས་དང་ངོ་བོ་སོགས་འཇོག་པ་ལ་འཐད་པར་མི་འགྲུབ་ཅེས་བརྗོད་པ་ཡིན་གྱི།སྤྱིར་བློ་རིགས་བདུན་ཡེ་ནས་མི་འདོད་ཅེས་དགག་པ་ག་ལ་ཡིན་ཏེ།སྤྱིར་བློ་རིགས་བདུན་ཡོད་པ་རིགས་པའི་གཞུང་ལུགས་ལས་རྟོགས་པ་ཡོད་བཞིན་མེད་དོ་ཞེས་ཅིའི་ཕྱིར་བརྗོད་དེ་མི་བརྗོད་དོ།།
སླར་སྨྲས་པ།
དེ་ལྟར་ལེགས་བྱས་སྤྲིན་ཚོགས་བསོད་ནམས་ཀྱི་ཕུང་བོ།།
ལུས་ཅན་སྡུག་བསྔལ་སེལ་བའི་བདུད་རྩི་ཉིད་གྱུར་ཏེ།།
ཡངས་བའི་རྒྱལ་ཁམས་ཀུན་གྱིས་དགའ་བདེ་ལ་རོལ་བཞིན།།
རྣམ་གྲོལ་རྒྱལ་ས་ཟིན་ཕྱིར་དགེ་ཚོགས་འདི་བསྔོའོ།།
ཞེས་དཔལ་སྔ་འགྱུར་ཨ་རིག་ཆོས་གྲྭའི་ངེས་དོན་བཤད་སྒྲུབ་དར་རྒྱས་གླིང་གི་ལོ་ཁོར་མོ་ཡུག་གི་རྒྱུགས་སྤྲོད་ཀྱི་ཆེད་དུ་རྨ་ཡུལ་དཀོན་མཆོག་བཀྲ་ཤིས་གུས་ཕུལ།
