在在下此一代80后香港男生心目中，歌神系张学友，绝对冇反驳；但讲到真正"广东歌总舵主"，在下谂，九成同代人会认同系Eason陈奕迅。嚟到广州先知，原来佢在大陆一样劲红，最近玩埋咩"新歌声"，即是话喺中国娱圈已经算系被公认为神坛级人马，伎艺人气都系顶晒班。
讲到佢的歌，几乎系人都识应该系"明年今日(十年)"、"浮夸"、"因为爱情"、"每一个明天"、"K歌之王"、"十面埋伏"之类。在下个人比较合心水系"苦瓜"、"任我行"、"富士山下"、"无条件"几首广东歌(都系近年之作)；鍾意歌词嘅深意，同埋呢种唱落似"讲嘢"嘅方式我觉得好啱广东话歌，可以显出广东话嘅抑扬，又有"吟诗"嘅感觉。不过，最近成日唱(就系冲凉房唱嗰种囉！)的系"不如不见"，副歌是咁的：
愈渴望见面然后发现/ 中间隔着那十年/ 我想见的笑脸/ 只有怀念/ 不懂 怎去再聊天/ 像我在往日还未抽烟/ 不知你怎么变迁/ 似等了一百年 忽尔明白/ 即使再见面/ 成熟地表演/ 不如不见
据说，歌词系讲一对旧恋人，多年不见后终于重聚，发觉故人仍在，但已唔系当日嗰个人，桃花依旧，只得彼此扮老友，几咁欷歔。
不过，在下觉得这样解读有点窄，甚至怀疑将之写成情歌，只系迎合市场同老板口味。其实睇返成首歌词，真正点明系讲爱情嘅其实得A2段一句："寻得到/尘封小店/回不到相恋那天"。如果这句改一个字变做"回不到相识那天"(按照广东歌填词技巧，高上声同高入声字通常可以互换，一样啱音)，咁成首歌可唔可以理解成咁样：从前死党，十年消磨，艰难重聚，人是心非，不如不见。
现实确实如此，几多年青时嘅朋友，当年[以为]系生死之交，但之后各奔前程，间中联络，成日话想聚聚，但真系聚返埋，发觉大家志向理想生活热情，完全改变晒。十几年时间，大家愈走愈远，坐返埋一齐，都唔知讲乜好，唯有讲下家常，讲下废话。一晚聚旧，原来系洗走一段美好回忆，早知唔见面，将友情凝在当天。
到底系边个变咗？歌词有一句系咁："谁为了生活不变"。其实大家都变咗，为生活，为生存，自觉自主改变，亦可能自主被改变......乜都好，点都冇可能仲系当日的我。其实都都冇得话边个好咗边个坏咗，总之，大家嘅世界唔同咗，冇得返转头，只系天真地希望，虽然我变咗，但你冇变。算把喇，揾日再啤啤佢......
揾日。
