[1992年版锡伯语小学语文课本第一册第19课]
holtosi
emu honin tuwakiyara haha jui bihebi, i an ucuri holo gisun gisureme efire amuran ofi, niyalmasa terei gisun be tenteke akdarakū. emu inenggi, ere haha jui emderei honin be dalime, emderei kaicame "niohe jihe, niohe jihe" serede, tokso i urse kaicara jilgan be donjifi, ere mudan jingkin oho seme gūnifi, sele šaka, moo mukšan jergi agūra be tukiyefi feksime jifi tuwaci, niohe i helmen be hono saburakū. geren niyalma geli honin tuwakiyara haha jui i arga de tuheke be safi, gemu bedereme yabuha.
udu inenggi duleme, haha jui alin meifehe de jing honin tuwakiyame bihei, emu amba niohe honin ci feksime jidere be sabufi, den jilgan i "niohe jihe, niohe jihe" seme kaicaha bici, yaya we jime honin be aitubure be saburakū. niohe honin i dolo feksime dosifi emu tarhūn amba honin be angga de ašufi ukame yooha.
