1843年上海开埠，是一座五方杂处个城市，邪气容易接受并吸收外唻文化搭多元文化，城市文化也是兼容并蓄个，勒拉老底子个上海文化当中，上海人顶欢喜使用个词语之一，就是迭个“洋”字。

        勒拉老底子个上海，假使讲有得一个大人，或者讲有一群大人个闲话，迭些大人只要是看到勒小囡，长相长得邪气好看，覅管对方是个男小囡，还是个女小囡，上海人侪都是欢喜叫做“洋囡囡”。

        勒拉计划经济年代里向个上海，上海人每家每户侪是需要去使用“煤球炉子”个，某些经济条件交关好个家庭，会得用“煤油炉子”，生炉子所用个“火柴”，上海人覅是称之为“自来火”，就是称之为“洋火”。“洋火”个使用频率要比“自来火”唻得高、唻得多，之所以上海人欢喜畀“火柴”称之为“洋火”，侪是因为“洋火”是由外国人发明个，是外国人从外国引进到中国、引进到上海唻个！

        勒拉老底子个上海，对于某些做生意个各类商贩唻讲伐，顶顶欢喜做个一桩事体，迭个就是－－“斩人家葱头”。“斩人家葱头”迭句闲话个意思是勒拉讲，对市场行情覅大了解个人群搭个人，买各类商品个辰光，既可以漫天叫价，还可以欺骗伊个铜钿，畀低档物品作为高价卖畀伊。还有一句闲话叫做：“伊拉专门是斩洋葱头个！”伊个意思是勒拉讲，勒拉做生意个过程当中，专门欢喜敲外国人个竹杠、骗外国人个铜钿，因为外国人对中国个情况、行情与市面是覅了解个，邪气容易下手个。畀过，现在个老外们，人也随之变得精明起唻，要想敲老外个一记竹杠，骗迭些人个铜钿，就覅如过去唻得便当！

        勒拉老底子个上海，混迹勒拉江湖（职场）中个上海男人，勒拉江湖（职场）中做生活个上海男人，眼扳数要准备好一两套好一眼个“洋装”，哪怕经济条件覅是邪气好个男人，同样也要准备好一套“洋装”个，所谓个“洋装”就是指“西装”。要是男人所穿个西装有明显个破损地方，又畀别人家发觉个闲话，上海人顶欢喜讲个一句闲话是：“迭个人真是一个洋装瘪三！”迭句闲话个意思是讲穷鬼。

        上海人曾经发明“假领子”，“假领子”又叫“节约领”，上海人穿西装一定要戴一条领带，要是西装里向衬着假领子戴着领带，就算碰着天气炎热个日脚，浑身上下冒汗大汗淋漓，侪覅能畀外套脱忒个，脱忒外套，上海人会讲：“迭个人赤膊戴领带，真是一个洋装瘪三嘛！”……容易畀大家看覅起、议论纷纷、说三道四一番个。

        勒拉老底子个上海人、勒拉俗常生活中，对铜钿个数量单位覅欢喜讲“元”，只欢喜讲“块”，去菜场买小菜问价钿、讨价还价，讲几元1斤，就算还价成功，营业员也会勒拉背后讲：“迭个人标标准准是一个洋盘，有一眼阿乡兮兮（滴答），大概今朝仔伊从十六铺码头刚刚上唻！”上海人还发明一个词语叫“洋钿”，自从发明“洋钿”迭个词语以后，讲“块”个辰光，眼扳数要加一个“洋钿”迭个后缀词语，比方讲：一块洋钿、五块洋钿、十块洋钿……就算是讲到角分，最后一定要加“洋钿”迭两个字，如：五分洋钿一把葱，一角洋钿三块老姜……勒拉老底子铜钿金额最高是十块，畀过自从诞生50块搭100块以后，是覅添加“洋钿”两个字，因为添加“洋钿”两个字，读起唻就覅大流利，所以就覅会使用。尽管“洋钿”迭个词语，现在使用得交关少，畀过，偶尔听到有人还勒拉讲，还是感到交关亲切。

        正因为上海是最早开放、最早接受外来文化搭西方文化个城市之一，所以勒拉俗常生活中，覅管是哪能个人，也覅管是做啥个行当个，侪都邪气欢喜搭“洋”字有联系，搭“洋”字沾亲带故做亲眷。

        上海人欢喜畀土豆或马铃薯叫做“洋山芋”；吹个各种气球称之为“洋泡泡”；连讲到“蜡烛”两个字，也要勒拉“蜡烛”个前头加一个“洋”字叫做“洋蜡烛”，还有一句上海俗语讲得好：“侬迭个人真是个洋蜡烛，勿点勿亮！”；清朝后期至解放初期，上海人所使用个各种银圆，比方讲：光绪元宝、袁大头、孙大头、墨西哥鹰元……上海人侪是叫做“银洋钿”；就连搭吾伲隔海相望个邻国日本，上海人也要称日本人，覅是叫“东洋人”，就是叫“东洋鬼子”……

        搭“洋”字有关系个词语，还有交关多，一时间是讲覅光个！

    【备注：①：文章为作者原创；②：各种范福生老上海风情画侪是唻源于网络上头，图文很有可能是覅相匹配个。；③：万分感谢原创图片。】

        杜老倌侠客居（陆伟）写于2014年02月01日礼拜六夜里向